بدفعلی، ایک بچے نے دوسرے کو قتل کر دیا

Reading Time: < 1 minute

پاکستان کے صوبہ پنجاب کے شہر راولپنڈی میں پولیس حکام کا کہنا ہے کہ اس سترہ سالہ لڑکے کو گرفتار کر لیا گیا ہے جس نے نویں جماعت کے سولہ برس کے طالب علم کو مبینہ طور پر بدفعلی کی کوشش میں ناکامی پر قتل کر دیا تھا ۔

صحافی یاسر حکیم کے مطابق راولپنڈی کے تھانہ ریس کورس کو سولہ سالہ سید زین کے والد عظمت حسین شاہ نے درخواست میں بتایا کہ اس کا بیٹا ٹیوشن پڑھنے جا رہا تھا جب اس کے ساتھ زبردستی بدفعلی کی کوشش کی گئی ۔

راولپنڈی ڈھوک سیداں کے رہائشی نے بتایا کہ سید زین نویں کلاس کا طالبعلم تھا اور اسے بدفعلی کی کوشش میں انکار پر گولی مار کر قتل کیا گیا ہے ۔

والد کے مطابق سید زین کو ملزم غیور حیدر نے روکا اور اسلحہ کی نوک پر گھر کے اندر لے جا رہا تھا لیکن مزاحمت پر گولی ماری گئی۔

عظمت حسین شاہ نے پولیس کو بتایا کہ مقتول بیٹا نویں کلاس کے امتحانات دے رہا تھا جس کو سینے میں گولی لگی ۔

سید زین کو ڈسٹرکٹ ہیڈ کوارٹر اسپتال پہنچایا گیا مگر وہ طبی امداد ملنے سے قبل ہی دم توڑ گیا ۔

کم عمر ملزم واردات کے بعد موقع سے فرار ہونے میں کامیاب ہو گیا تھا ۔

ریس کورس پولیس نے مقتول زین کے والد عظمت حسین کی درخواست پر مقدمہ درج کرنے کے بعد رات گئے ملزم کو گرفتار کر لیا ۔ ملزم سے واردات میں استعمال کیا گیا پستول بھی برآمد کر لیا گیا ہے ۔

مقتول زین کے والد کے مطابق ملزم انہی کے محلے میں رہتا ہے اور پہلے بھی اس کے بیٹے کو تنگ کرتا رہتا تھا۔